Nurhayati Vol 2

Bise dikate jadi Nurhayati entu gak gampang, rempong dan ribet. Tiap ari ade aje kegalauan nyang dateng maranin Nurhayati. Masalah demen ama Nenes blom kelar, enih dah nyantol lelaki laen. Nyang enih anak kuliahan, nah enih cowok tampangnye mayanlah, kulitnya terang walo gak seputih Nenes. Tinggi palingan 168 cm, rada kumisan bekas cukur. Gayanye kekinian tapi casual dan die rajin mangkal di Warkop alias warung kupi. Posisi entu warung palingan 100 meter dari rumahnye Nurhayati. 

Ceritanye gini nih, pan Babeh Nur lagi sakit plu, yaelah cume pilek doangan ! Tapi brisiknye kaye mo beranak, mane pas ari Minggu. Entu Nurhayati udeh berase pembantu umum, disuruh ini onoh ampe joprak rasanye. Nah jem 3 sore si Babeh recet kaye bocah, "Nuuurrr !!! Yaelah budeg kali ni bocah ! Nuuurrrr", Pekik Babeh dengan suara parau.

Nurhayati muncul dengan wajah putih penuh masker, ia baru aje  semenit maskeran, "Ape Beh ? Aye baru juge maskeran".

Babeh merintih manje, "Enyak lu kemane sih ? Udeh tau laki sakit bukannye dikelonin".

"Pan Enyak lagi ikut ziarah ke Cirebon ame ibu - ibu pengajian ?! Palingan malem baru pulang", Ujar Nurhayati sembari berkaca.

Babeh malah makin - makin, "Ya udeh, lu sekarang ke warung kupi nyang dipengkolan depan, beliin Babeh kupi item, pengen nyang anget neh".

Sebenernye Nur noh kesel, lha pan die lagi maskeran kudunye diem tiduran, bukannye ngemeng molo. "Beh !! Aye bikinin aje, aye pan baru aje masang masker masak diapus sih"

"Muke gile, kagak dah kalo elu nyang bikin, terakhir lu bikin entu garem nyang lu masupin, udeh sonoh cuci muke. Ganjen amat, noh Enyak lu kagak pakek gituan aje tetep cakep", Kata Babeh sembari ngasih duit gocap. 

Nurhayati rasanya pengen ngejerit kesel, susah amat yak pengen cantik. Tapi toh die cuci juge entu muke. Dengan lesu die jalan ke warung kupi. Sampe warung die malah auto galau, die liat entu cowok. "Anjiiiir !!! Enih cowok bikin ati aye blangsak gini sih", Jerit Nur dalam hatinya nan sepi. Cowok entu megangin Hp Samsung sembari bbm-an, kadang entu cowok nyengir. Sumpah dah rasanye Nur pengen nomplok aje, gak kuat rasanye disuguhin pemandangan begonoh. 

"Neng ?!! Lu mo beli ape ? Bengong aje ?", Tegor Mak Sum si pemilik warung.

Nur jelas gelagepan, "Ehh anu Mak, aye pesen kupi item dibungkus". Dan dalam hati Nur bersumpah bakal balik lagi.

Pas sampe rumah Nurhayati buru - buru nyuguhin Babeh kupi nyang tadi die beli, Babeh rada bingung, Nur peginye cemberut ngapah baliknye nyengir aje ? Belon sempet nanye eh Nur udeh kabur. 

*****

"Lho ? Balik lagi luh ? Kurang ape Babeh lu ngupi ?", Ujar Mak Sum sembari rempong ngelapin gelas. Nur kagak mau mati gaye, die pun mesen mie ame es milo. Dia liat tu cowok bangku sebelahnye kosong. 

"Bang, aye numpang duduk dimari yak", Ujar Nur sembari mandangin entu cowok dengan hati bledag bledug.

"Ohh silahkan cantik, ini tas ransel Abang biar dimeja aja", Sahut cowok itu dengan suara ngebas.

"Mateee die manggil aye cantik", Jerit Nur dalam hati, wajah Nur pun memerah. Gile ni cowok baunye enak, kaye Asinan Betawi. Nur juge liat entu cowok bawa sepatu bola. "Hmm abis putsal kayanye", Pikir Nur.

Nur pingin bersolek, dia membuka bedak dan mengintip wajahnya dari cermin kecil, dan kagetnye asli dah  naudzubile, entu muke masih cemong aje kena masker. Dan Nur sibuk ngelap mukenye. Setelah yakin mukenye cantik Nur molai negor entu cowok, "Abang abis putsal yak ?"

Cowok itu tersenyum trus ngejawab pake suare ngebas, "Kok tau aje Dek ?"

Nur tersenyum malu malu giroh, "Iye Bang, pan baunye Abang kaye asinan"

Cowok itu terdiam sambil mengendus lengannya dengan agak malu - malu, "Maksud elu, bau gue asem ya ? Asinan kan asem ?!"

Nurhayati gelagepan, bujud dah ah, bukan asem cuka maksudnye, duh enih akibat basa basi busuk. "Eeh bukan entu Bang, asinan yang enak nyang ade bau kacang gitu loch".

Cowok itu cuma senyum lalu balik asik mandangin layar Hp lagi. Gak lama pesenan Nur nongol juge. Mak Sum ngemeng ke cowok entu, "Irpan, lu kagak sekalian mesen mie ? Tar giliran aye ribet, baru dah mesen".

"Kagak Mak, tadi aye udeh mindo bakso pas mo kemari", Jawab cowok entu.

Nurhayati jadi tau nama cowok entu, "Abang namanye Irpan yak ? Kaye temen sekolah aye noh".

"Sebenernye Irvan sih, nama gue emang pasaran kayanye", Sahut si Irvan sambil mengelap wajahnye pake anduk kecil.

"Ehh tapi Irpan nyang di skul aye kagak ganteng kaye Abang, hmm orang ganteng  tapi masih jomblo yak Bang ?", Ujar Nur mulai kepoh.

Irvan tertawa lalu bicara, "Gue punya pacar kok Dek, satu kampus"

Nurhayati berasa jatoh diatas tumpukan seng nyang berisiknye naudzubileh trus udeh gituh dikejar anjing, rasanye ngap alias sesek di dada. Nurhayati makan buru - buru dan langsung pamit. Makin lama disebelah Irvan takutnye makin susah buat ngebunuh bibit cinte nyang tau - tau tumbuh di hati Nur.

Urusanye begindang ya balik ke hati Nenes dah. Entu cowok basket emang begok kali ye ? Masih kagak ngeh aje kalo Nurhayati demenin. Nur akhirnye cuma manyun aje di kamarnye. Babeh jadi bingung, lha ni bocah ngapah memble aje ?, "Neng, elu kenape mukenye kusut begituh ? Kaye selimut Enyak lu".

"Kagak kenape - kenape Beh, cuma lagi males ngomong", Sahut Nur sembari ngulet.

Babeh nyodorin duit cepek, "Nih tulungin beli Sop Kambing di Haji Lukman, kembaliannye buat elu. Ayo cepetan keburu malem".

Nur sebenernye males jalan tapi kembalian Sop masih lapan puluh rebu, mayan onoh. Dan Nurhayati pegi beli Sop bareng Nenes nyang grayutan dipikirannye.